ਨਵੀਂ ਦਿੱਲੀ, 11 ਫਰਵਰੀ : ਕੇਂਦਰ ਸਰਕਾਰ ਦੇ ਵਿਦੇਸ਼ ਮੰਤਰਾਲੇ ਦੀ ਇੱਕ ਰਿਪੋਰਟ ਵਿੱਚ ਪੰਜਾਬ ਦੇ ਟਰੈਵਲ ਏਜੰਟਾਂ ਬਾਰੇ ਖੁਲਾਸਾ ਹੋਇਆ ਹੈ ਕਿ ਰਾਜ ਵਿੱਚ ਸਿਰਫ 212 ਟਰੈਵਲ ਏਜੰਟ ਹੀ ਹਨ ਜਿਨ੍ਹਾਂ ਕੋਲ ਵੈਧ ਲਾਇਸੰਸ ਹੈ। ਪੰਜਾਬ ਦੇ 92 ਫੀਸਦੀ ਟਰੈਵਲ ਏਜੰਟ ਗੈਰ-ਕਾਨੂੰਨੀ ਤੌਰ ‘ਤੇ ਕੰਮ ਕਰ ਰਹੇ ਹਨ। ਸਿਰਫ 8 ਫੀਸਦੀ ਏਜੰਟ ਹੀ ਕੇਂਦਰੀ ਗਾਈਡਲਾਈਨਾਂ ਦੇ ਅਧੀਨ ਆਉਂਦੇ ਹਨ। ਰਾਜ ਦੇ 8 ਜ਼ਿਲ੍ਹਿਆਂ ਵਿੱਚ ਇਮੀਗ੍ਰੇਸ਼ਨ ਦੇ ਦਫ਼ਤਰ ਖੋਲ੍ਹ ਕੇ ਬੈਠੇ ਕਿਸੇ ਵੀ ਏਜੰਟ ਕੋਲ ਲਾਇਸੰਸ ਨਹੀਂ ਹੈ।
ਜਾਣਕਾਰੀ ਅਨੁਸਾਰ, 212 ਏਜੰਟਾਂ ਵਿੱਚੋਂ ਵੀ ਲਗਭਗ 65 ਦੇ ਲਾਇਸੰਸ ਦੀ ਮਿਆਦ ਖਤਮ ਹੋ ਚੁੱਕੀ ਹੈ। ਕੇਂਦਰ ਸਰਕਾਰ ਇਨ੍ਹਾਂ ਦੇ ਲਾਇਸੰਸ ਵੀ ਆਪਣੇ ਪੱਧਰ ‘ਤੇ ਰੱਦ ਕਰ ਚੁੱਕੀ ਹੈ। ਪੰਜਾਬ ਦੇ ਲਗਭਗ ਹਰ ਜ਼ਿਲ੍ਹੇ ਵਿੱਚ ਵੱਡੇ ਪੱਧਰ ‘ਤੇ ਗੈਰ-ਕਾਨੂੰਨੀ ਤੌਰ ‘ਤੇ ਟਰੈਵਲ ਏਜੰਟਾਂ ਦਾ ਕੰਮ ਚੱਲ ਰਿਹਾ ਹੈ। ਇਸ ਨਾਲ ਧੋਖਾਧੜੀ ਦੀਆਂ ਸੰਭਾਵਨਾਵਾਂ ਵੀ ਵਧ ਗਈਆਂ ਹਨ।
ਕੇਂਦਰ ਸਰਕਾਰ ਗੁਜਰਾਤ, ਪੰਜਾਬ, ਚੰਡੀਗੜ੍ਹ ਅਤੇ ਦਿੱਲੀ ਦੇ ਕਈ ਫਰਜ਼ੀ ਟਰੈਵਲ ਏਜੰਟਾਂ ਖਿਲਾਫ਼ ਕਾਰਵਾਈ ਕਰਨ ਦੀ ਤਿਆਰੀ ਵਿੱਚ ਹੈ। ਪੰਜਾਬ ਦੇ ਲਗਭਗ ਅੱਠ ਜ਼ਿਲ੍ਹੇ ਅਜਿਹੇ ਹਨ, ਜਿਨ੍ਹਾਂ ਜ਼ਿਲ੍ਹਿਆਂ ਦਾ ਇੱਕ ਵੀ ਟਰੈਵਲ ਏਜੰਟ ਕੇਂਦਰ ਦੀ ਲਿਸਟ ਵਿੱਚ ਰਜਿਸਟਰਡ ਨਹੀਂ ਹੈ। ਇਨ੍ਹਾਂ ਜ਼ਿਲ੍ਹਿਆਂ ਵਿੱਚ ਸ੍ਰੀ ਮੁਕਤਸਰ ਸਾਹਿਬ, ਤਰਨ ਤਾਰਨ, ਫਰੀਦਕੋਟ, ਪਠਾਨਕੋਟ, ਫਿਰੋਜ਼ਪੁਰ, ਮਲੇਰਕੋਟਲਾ, ਫਾਜ਼ਿਲਕਾ ਅਤੇ ਮਾਨਸਾ ਸ਼ਾਮਲ ਹਨ।
ਦੱਸ ਦੇਈਏ ਕਿ ਇਨ੍ਹਾਂ ਜ਼ਿਲ੍ਹਿਆਂ ਦੇ ਕੁੱਲ 2730 ਫਰਜ਼ੀ ਟਰੈਵਲ ਏਜੰਟ ਕੇਂਦਰ ਨੇ ਲਿਸਟ ਆਉਟ ਕੀਤੇ ਹਨ। ਜਿਨ੍ਹਾਂ ਖਿਲਾਫ਼ ਕੇਂਦਰੀ ਜਾਂਚ ਏਜੰਸੀਆਂ ਕਾਰਵਾਈ ਦੀ ਤਿਆਰੀ ਵਿੱਚ ਹਨ। ਕੁਝ ਮੀਡੀਆ ਰਿਪੋਰਟਾਂ ਵਿੱਚ ਇਸਦਾ ਦਾਅਵਾ ਕੀਤਾ ਗਿਆ ਹੈ। ਕੇਂਦਰ ਸਰਕਾਰ ਦੁਆਰਾ ਅਮਰੀਕਾ ਤੋਂ ਡਿਪੋਰਟ ਕੀਤੇ ਗਏ 104 ਭਾਰਤੀਆਂ ਦੀਆਂ ਫਾਈਲਾਂ ਦੇ ਆਧਾਰ ‘ਤੇ ਵੀ ਵੱਖਰੀ ਕਾਰਵਾਈ ਕੀਤੀ ਜਾਵੇਗੀ।
ਦੱਸ ਦੇਈਏ ਕਿ ਰਾਜ ਦਾ ਸਭ ਤੋਂ ਵੱਡਾ ਵੈਧ ਟਰੈਵਲ ਏਜੰਟਾਂ ਦਾ ਕੰਮ ਜਲੰਧਰ ਵਿੱਚ ਕੀਤਾ ਜਾਂਦਾ ਹੈ। ਅਜਿਹਾ ਕੇਂਦਰ ਸਰਕਾਰ ਦੀ ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਹੈ। ਜਲੰਧਰ ਤੋਂ ਬਾਅਦ ਮੋਹਾਲੀ ਅਤੇ ਫਿਰ ਹੁਸ਼ਿਆਰਪੁਰ ਵਿੱਚ ਸਭ ਤੋਂ ਜ਼ਿਆਦਾ ਟਰੈਵਲ ਏਜੰਟ ਰਜਿਸਟਰਡ ਹਨ। ਜਲੰਧਰ ਵਿੱਚ ਸਭ ਤੋਂ ਜ਼ਿਆਦਾ ਕੁੱਲ 86 ਲਾਇਸੰਸਧਾਰਕ ਟਰੈਵਲ ਏਜੰਟ ਹਨ। ਜਿਨ੍ਹਾਂ ਵਿੱਚੋਂ 16 ਦੇ ਲਾਇਸੰਸ ਦੀ ਮਿਆਦ ਖਤਮ ਹੋ ਚੁੱਕੀ ਹੈ। ਜਿਨ੍ਹਾਂ ਦੇ ਲਾਇਸੰਸਾਂ ਦਾ ਨਵੀਨੀਕਰਨ ਹੋਣ ਵਾਲਾ ਹੈ। ਨਾਲ ਹੀ ਚਾਰ ਲਾਇਸੰਸ ਰੱਦ ਵੀ ਕੀਤੇ ਗਏ ਹਨ।
ਦੂਜੇ ਨੰਬਰ ‘ਤੇ ਮੋਹਾਲੀ ਵਿੱਚ ਸਭ ਤੋਂ ਜ਼ਿਆਦਾ ਟਰੈਵਲ ਏਜੰਟਾਂ ਕੋਲ ਲਾਇਸੰਸ ਹਨ। ਮੋਹਾਲੀ ਦੇ ਕੁੱਲ 31 ਟਰੈਵਲ ਏਜੰਟ ਅਜਿਹੇ ਹਨ, ਜੋ ਕਿ ਕੇਂਦਰ ਕੋਲ ਰਜਿਸਟਰਡ ਹਨ। ਉਸ ਤੋਂ ਬਾਅਦ ਹੁਸ਼ਿਆਰਪੁਰ ਵਿੱਚ 22, ਲੁਧਿਆਣਾ 20 ਅਤੇ ਹੋਰ ਥਾਵਾਂ ‘ਤੇ ਬਾਕੀ ਦੇ ਲਾਇਸੰਸ ਰਜਿਸਟਰਡ ਹਨ। ਫਤਿਹਗੜ੍ਹ ਸਾਹਿਬ ਵਿੱਚ ਇੱਕ ਏਜੰਟ (ਲਾਇਸੰਸ ਮੁਅੱਤਲ), 2 ਸੰਗਰੂਰ (ਇੱਕ ਦਾ ਲਾਇਸੰਸ ਰੱਦ), ਸ਼ਹੀਦ ਭਗਤ ਸਿੰਘ ਨਗਰ ਵਿੱਚ 3 (ਇਨ੍ਹਾਂ ਵਿਚੋਂ ਇਕ ਦਾ ਲਾਈਸੰਸ ਖਤਮ ਹੋ ਚੁੱਕਾ ਹੈ), ਮੋਗਾ ਜਿਲੇ ਵਿਚ ਦੋ (ਇਕ ਦਾ ਲਾਈਸੰਸ ਖਤਮ), ਕਪੂਰਥਲਾ ਵਿਚ ਕੇਵਲ ਤਿੰਨ ਅਤੇ ਪਟਿਆਲਾ ਵਿਚ ਇਕ ਏਜੰਟ ਨੇ ਲਾਈਸੰਸ ਲਿਆ ਹੋਇਆ ਹੈ।
