ਓਟਾਵਾ : ਕੈਨੇਡਾ ਸਰਕਾਰ ਨੇ ਵਿਦੇਸ਼ਾਂ ਤੋਂ ਸਕਿਲਡ ਵਰਕਰਾਂ ਨੂੰ ਬੁਲਾਉਣ ਲਈ ਵਰਕਰ ਪਰਮਿਟ ਦਾ ਨਵਾਂ ਪਾਈਲਟ ਪ੍ਰੋਗਰਾਮ ਸ਼ੁਰੂ ਕੀਤਾ ਹੈ, ਜਿਸ ਵਿਚ ਐਲ ਐਮ ਆਈ ਏ ਲੈਣ ਦੀ ਜਰੂਰਤ ਨਹੀਂ ਹੋਵੇਗੀ। ਕੈਨੇਡਾ ਸਰਕਾਰ ਵਲੋਂ ਦੋ ਸਾਲ ਲਈ ਸ਼ੁਰੂ ਕੀਤੇ ਗਏ ਗਲੋਬਲ ਹਾਈਪਰ ਗਰੋਥ ਪ੍ਰੋਜੈਕਟ ਅਧੀਨ ਕੈਨੇਡਾ ਦੀਆਂ ਕੁੱਝ ਕੰਪਨੀਆਂ ਨੂੰ ਇਹ ਛੋਟ ਦੇ ਦਿੱਤੀ ਗਈ ਹੈ ਕਿ ਉਹ ਬਿਨਾਂ ਐਲ ਐਮ ਆਈ ਏ ਤੋਂ ਵੀ ਵਿਦੇਸ਼ਾਂ ਤੋਂ ਸਕਿਲਡ ਨੌਜਵਾਨਾਂ ਨੂੰ ਬੁਲਾ ਸਕਦੇ ਨੇ। ਕੈਨੇਡਾ ਦੇ ਇਮੀਗਰੇਸ਼ਨ ਮੰਤਰੀ ਨੇ ਦੱਸਿਆ ਕਿ ਕੈਨੇਡਾ ਦੀਆਂ ਕੰਪਨੀਆਂ ਵਿਚ ਵਧੀਆ ਕੰਮ ਕਰਨ ਵਾਲੇ ਮਾਹਿਰ ਨੌਜਵਾਨਾਂ ਦੀਆਂ ਸੇਵਾਵਾਂ ਲਈਆਂ ਜਾਣਗੀਆਂ। ਇਸ ਨਾਲ ਕੈਨੇਡਾ ਦੀਆਂ ਕੰਪਨੀਆਂ ਦੀ ਸਥਿੱਤੀ ਵਿਚ ਹੋਰ ਸੁਧਾਰ ਆਵੇਗਾ। ਵਰਕ ਪਰਮਿਟ ਦੇ ਇਸ ਨਵੇਂ ਪ੍ਰੋਗਰਾਮ ਤਹਿਤ ਵਰਕ ਪਰਮਿਟ ਅਪਲਾਈ ਕਰਨ ਵਾਲੇ ਵਿਅਕਤੀ ਦੇ ਪਰਿਵਾਰਕ ਮੈਂਬਰ ਨੂੰ ਓਪਨ ਵਰਕ ਪਰਮਿਟ ਜਾਰੀ ਕੀਤਾ ਜਾਵੇਗਾ।
ਇਸ ਨਵੇਂ ਇਨੋਵੇਸ਼ਨ ਪ੍ਰੋਗਰਾਮ ਤਹਿਤ ਚੁਣੀਆਂ ਹੋਈਆਂ ਕੰਪਨੀਆਂ ਵਿਚੋਂ ਕੋਈ ਵੀ ਕੰਪਨੀ ਆਪਣਾ ਜੌਬ ਲੈਟਰ ਦੇ ਸਕਦੀ ਹੈ। ਉਹ ਨੌਜਵਾਨ ਜੌਬ ਲੈਟਰ ਨਾਲ ਹੀ ਸਿੱਧਾ ਵਰਕ ਪਰਮਿਟ ਅਪਲਾਈ ਕਰ ਸਕਦਾ ਹੈ। ਇਮੀਗਰੇਸ਼ਨ ਅਫਸਰ ਨੇ ਕੇਵਲ ਇਹ ਹੀ ਚੈੱਕ ਕਰਨਾ ਹੈ ਕਿ ਵਾਕਿਆ ਹੀ ਸਬੰਧਿਤ ਨੌਜਵਾਨ ਆਪਣੇ ਕੰਮ ਵਿਚ ਪੂਰਾ ਸਮਰੱਥ ਹੈ। ਜਿਸ ਵੀ ਖੇਤਰ ਵਿਚ ਕੰਮ ਕਰਨ ਲਈ ਵਰਕ ਪਰਮਿਟ ਅਪਲਾਈ ਕਰਨਾ ਹੋਵੇਗਾ, ਉਸ ਖੇਤਰ ਦਾ ਪੂਰਾ ਤਜ਼ਰਬਾ ਹੋਣਾ ਜਰੂਰੀ ਹੈ।
ਇਸ ਤਰਾਂ ਕੈਨੇਡਾ ਸਰਕਾਰ ਦੇ ਇਸ ਨਵੇਂ ਇਨੋਵੇਸ਼ਨ ਪ੍ਰੋਜੈਕਟ ਨਾਲ ਚੰਗੀ ਸਕਿੱਲ ਵਾਲੇ ਨੌਜਵਾਨਾਂ ਨੂੰ ਬਹੁਤ ਫਾਇਦਾ ਹੋਵੇਗਾ। ਕੈਨੇਡਾ ਸਰਕਾਰ ਦਾ ਇਹ ਪ੍ਰੋਜੈਕਟ ਲਗਾਤਾਰ ਦੋ ਸਾਲ ਚੱਲੇਗਾ।